巴勒斯坦國

The state of Palestine 巴勒斯坦國
旗 徽
國歌：فدائي  （阿拉伯文） 《我的救贖》
巴勒斯坦宣稱國土
屬地（實轄）
幅員 國土：2,500平方公里
首都	東耶路撒冷（宣稱） 拉姆安拉（事實上）
最大城市	加沙
時區	UTC+3
國民
人數	人數：6,390,000（世界第121名） 人口密度：731/km2
官方語言	阿拉伯文
民族	巴勒斯坦人
主要宗教	伊斯蘭教
主要節日	烈士日（1月7號）
政制
主要領袖 國家元首（總統）：阿巴斯 政府首腦（總理）：穆罕默德·穆斯塔法
經濟
GDP（國際匯率） 總計：$180億美金 人均：$3,464美金
貨幣	新謝克爾 (全國) 埃及鎊 (加沙走廊) 約旦第納爾 (西岸地區)
資訊
國家代碼	BL
國際域名縮寫	.bl
國際電話區號	970（預留）

巴勒斯坦國 (粵拼： Baa1 Lak6 Si1 Taan3 阿拉伯文：دولة فلسطين，羅馬化：Dawlat Filasṭīn) ，係一個位於西亞黎凡特南部嘅政體，官方上係由巴勒斯坦解放組織管治。

巴勒斯坦國喺1988年11月15號曾經宣佈獨立，而佢嘅宣稱國土包括西岸地區、加沙走廊、同埋東耶路撒冷做首都。呢啲地方自從1967年六日戰爭以嚟，有至少部分都係由以色列佔領。

歷史

喺二次大戰之後，聯合國大會通過咗181號決議，正式分割巴勒斯坦地區做阿拉伯國同猶太國，而耶路撒冷就會成為城邦。喺決議通過之後冇耐，就爆發咗第一次中東戰爭，所以決議嘅計劃並冇實行到。喺1948年5月14號，以色列宣佈獨立之後，附近嘅阿拉伯國家就開始入侵以色列。喺戰後，埃及喺加沙走廊成立咗全巴勒斯坦保護國，而約旦就吞併咗西岸地區，包括東耶路撒冷。

到1967年嘅六日戰爭期間，以色列控制咗西岸地區、加沙走廊、戈蘭高地、同埋西奈半島，完全咁佔領咗巴勒斯坦國嘅宣稱國土，亦控制咗埃及同敘利亞嘅部分國土。

喺1988年11月15號，阿拉法特喺阿爾及爾發佈咗《巴勒斯坦獨立宣言》，宣佈成立巴勒斯坦國。喺1993年，以色列同巴勒斯坦解放組織簽咗《奧斯陸協議》，建立咗巴勒斯坦自治政府嚟管治巴勒斯坦國嘅部分地區。

喺2005年，以色列完全撤出加沙走廊，包括拆哂啲聚居地。到2006年巴勒斯坦立法會選舉之後，哈馬斯成功喺加沙走廊贏咗大多數。喺加沙之戰之後，實際咁控制加沙走廊。

自從以色列-哈馬斯戰爭喺2023年10月爆發以嚟，以巴衝突都惡化咗。喺2024年2月26號，成個巴勒斯坦自治政府大規模咁辭職，包括政府嘅總理。

爭議領土

根據《奧斯陸協議》，西岸地區分咗做唔同嘅區份：A同B區包含咗165個飛地，而C區就有超過200個以色列聚居地。喺加沙走廊，自從以色列撤出以嚟，雖然係由巴勒斯坦自治政府（最先係法塔赫，之後係哈馬斯）管治，但係一直都俾埃及同以色列封鎖，所以大部分人道組織，包括聯合國同紅十字會，都認爲加沙仍然係受佔領。除此之外，巴勒斯坦國亦宣稱東耶路撒冷做佢嘅首都，但係國際社會一般嘅觀點都係：呢個問題要先經過以巴兩邊嘅談判，先至能夠得出結論。

外界關係

巴勒斯坦國喺唔同嘅國際組織都有參與，包括阿拉伯聯盟、伊斯蘭會議組織、國際奧委會、UNESCO、同埋國際刑事法院等等。巴勒斯坦喺2011年爭取成為聯合國成員失敗，但係喺2012年升呢做觀察成員，係第一次有全部國家承認巴勒斯坦國嘅至少部分主權。

雖然有158個聯合國成員國、梵蒂岡、阿拉伯撒哈拉民主共和國承認佢係一個獨立主權國，但係仍然有唔少國家跟住美國、以色列嘅大隊，仲未承認佢係個獨立主權國，包括：美國、以色列、巴拿馬、厄立特里亞、喀麥隆、中華民國、日本、大韓民國、緬甸、星加坡、德國、意大利、荷蘭、瑞士、丹麥、芬蘭、希臘、奧地利、列支敦士登、克羅地亞、科索沃、北馬其頓、摩爾多瓦、愛沙尼亞、拉脫維亞、立陶宛、紐西蘭、所羅門群島、薩摩亞、馬紹爾群島、圖瓦盧、湯加、帛琉、瑙魯、斐濟、基里巴斯、密克羅尼西亞聯邦。

睇埋

• 以巴衝突

出面網頁

• 〈国家概况 — 中华人民共和国外交部〉 (簡體中文)。中華人民共和國外交部。
• 〈パレスチナ ｜ 外務省〉 (日文)。日本外務省。