The Odyssey (fime, 2026)

L' Odissêye

Pol discramiaedje des årtikes avou l' mot « Odissêye », loukîz cial.

L' Odissêye (The Odyssey), c' est on fime di Christopher Nolan k' a rexhou e 2006.

C' est on racontaedje del «vraiye Odissêye» a môde di çou k' est tecnicmint fijhåve et comierçålmint dujhåve e cinema.

Rimetaedje do fime å powinme grek

Li fime est basti avou toplin des alié-rtoûs dins l' tins.

Avou ça ki les etapes dins l' fime ni sont nén totes les minmes ki dins l' mwaisse sicrijhaedje.

Li fén n' est nén foirt råjhnåve. Ele rishonne a on fime di Rambo. Li vî Ulisse, k' a trinné d' mizere 10 ans å lon, et ki dvreut esse flåwe come on vî pôve, si bate lu tot seu conte ene nûte di galants k' årént volou rmaryî s' feme. Come di djusse, c' est lu k' est l' pus foirt. Mins cisse fén, c' est come çoula dins l' powinme grek. Gn a djusse li passaedje mon des Feyacyins (iye di Corfou d' asteure), la k' i va aboirder al fén di s' voyaedje, ki n' est nén rprins dins l' fime. Mins non pus, c' est la k' Ulisse åreut lodjicmint rprins des foices, å palå do rwè des Feyacyins.

Li fén des féns, la k' i dene li trône a s' fi, et k' il eva a l' avinteure e batea avou s' feme, ça shonne ossu esse edvinté. C' est l' shûte d' ene idêye da Penelope, tot å cminçmint do fime, dijhant a Ulisse di n' nén aler al guere, et di naivyî evoye viè Solea-djus.

Mins gn a sacwants bokets d' l' Odissêye ki n' sont nén rprezintés dins l' fime:

• L' arivêye d' Ulisse mon les Feyacyins, so ene naivlicote, et sol pladje, si resconte avou Nozicaha k' el va moenner å palå di s' pa. Et l' shûte la k' les Feyacyins vont remoenner Ulisse a Itak.
• Li prumire disbarcumint mon les Kicônes, et l' touwaedje des sôdårds, et l' leyaedje do priyesse-vignuron ki dene doze anfôres di vén k' i va sôler l' ciclope avou.
• Li passaedje dé Eyole, et l' paskêye del djusse avou les airs contråves.
• Li passaedje mon les magneus d' lotusse.

Gn a des etapes di l' Odissêye ki sont rprinjhes dins l' fime, mins ki sont pår ricandjeyes:

• C' est Calipso ki fwait magnî do lotusse a Ulisse po k' i n' si rapele di rén. Mins al fén, adon k' i voet on boket di s' batea, rahertchî sol pladje, et k' i cmince a s' rissovni, Calipso leye-minme lyi espaitche d' endè magnî et acceptêye d' el leyî libe, et l' mete so on boket d' bwès k' el va remoenner a Itak.
• Tos les cåzaedjes d' Ulisse avou l' ciclope, et l' rujhe d' Ulisse di dire å ciclope k' i s' lome «Nolu».
• Li resconte avou l' grimancyinne Circé ni mostere nén k' Ulisse va coûtchî avou leye, et k' i dmorèt eshonne èn an.

Li powinme grek ni cåze waire del guere di Trwè. Li fime, bén. Li persounaedje di Sinon, k' atoûne les Trweyins a fé intrer li tchvå d' Trwè dins l' veye, i n' egzistêye nén dins l' powinme d' Homere. Il est cité pus tård pa Virdjile.

Li fime mostere bén li spoûle do vî tchén d' Ulisse ki l' a ratindou et ki li ricnoxhe, après 20 ans. I refoircixh ci passaedje la tot mostrant Ulisse ki candôze ci tchén la, ki n' est co k' on tchinot, divant d' endaler al guere.