Alakamisy

Ny Alakamisy dia andro fahefatra ao amin' ny herinandro raha ny Alatsinainy no andro voalohany fa andro fahadimy kosa raha ny Alahady no andro voalohany. Andro voalohany ny Alakamisy ho an' ny Malagasy mandala ny nentin-drazana tsy mandray ny Alatsinainy na ny Alahady ho andro voalohany amin' ny herinandro. Ny Malagasy talohan' ny fidiran' ny kolontsaina arabo sy ny kolontsaina tandrefana dia nisy nanao ny Alakamisy ho andro voalohany amin' ny herinandro.

Fiavian' ny teny

Ny teny malagasy hoe Alakamisy na Lakamisy na Kamisy dia avy amin' ny teny arabo hoe الخميس / al-khamīs izay midika hoe "ny fahadimy".

Kolontsaina malagasy momba ny andro Alakamisy

Laharan' ny Alakamisy

Alakamisy no andro voalohany teo amin' ny Ntaolo malagasy; andron' Andriana, fisantarana ny zavatr' Andriana; andro fidin' ny Andriana hisehoana amin' ny vahoaka.

Ny andro Alakamisy ao amin' ny finoan-drazana malagasy

Andro tsara

Andro tsara ny Alakamisy: ny zavatra irina hisy soa mitontohitra no atao, alaina na santarina Alakamisy. Andro tsara ny Alakamisy fa manantena hisy. Andro fivoahan' ny Andriana sy fisantarana ny zavatr' Andriana, fisantaran-trano, fampakaram-bady, fiakaran' ny tafika sady fivoahany.

Andro ratsy

Andro ratsy ihany koa ny Alakamisy: mampisy loza. Ohatra: fady ny mandevina Alakamisy fa miandry Zoma, mbamin' ny miala saona, ny mamangy malahelo. Ny akorandriaka no faditry ny andro Alakamisy.

Ohabolana momba ny andro Alakamisy

• Ny Alakamisy an' Andriamanelo, ary ny Zoma an' Andriamananitany; ataoko fanjakana arindra.
• Ny maty no tsy alevina alakamisy sy alahady, ny velona no tandrovina.

Jereo koa

• Alatsinainy - Talata - Alarobia - Zoma - Asabotsy - Alahady
• Tetiandro
• Tetiandro malagasy

• Tetiandro gregôriana: Janoary, Febroary, Marsa, Avrily, Mey, Jona, Jolay, Aogositra, Septambra, Ôktôbra, Nôvambra, Desambra.