魁北克省

  提示：呢篇文講嘅唔係魁北克市。

魁北克省喺加拿大嘅位置

魁北克省（法文：Québec /kebɛk/ ，類似粵拼：gei3 bek1；英文：Quebec /kwəˈbɛk/ ，粵拼：粵化口語音：kiu6 bek1 或者 kwou6 bek1），簡稱魁省，以前啲當地華人用臺山話發音嚟譯古壁省，係加拿大東部嘅一個省；人口8,501,833。魁北克嘅官方語言係法文，全加拿大淨係呢個省淨係用法文。省會係魁北克市，最大嘅城市係滿地可。

加拿大未立國之前，英國政府曾經叫佢做 ｢下加拿大｣（Lower Canada），指佢嘅位置係喺聖羅倫斯河下游。

地理

内文：魁北克地理

魁北克係加拿大最大嘅省（連埋三個特區計嘅話，細過努那活少少），面積係法國嘅三倍。省入面好多地方都好少人。魁北克省超過90%嘅地方係加拿大地盾。北面廣闊，唔多人住。魁北克喺加拿大東面，西面黐住安大略省同哈德遜灣，東面係大西洋，南面黐住美國（緬因州、紐咸西州、佛蒙特州同紐約州），北面係北冰洋。

省入面最大嘅水電工程起喺La Grande Rivière（大河）上面。極北係極地同埋副極地氣候，有啲因紐特部族嘅人住喺度。

最多人嘅地方係南面嘅聖勞倫斯河谷，省會魁北克市同滿地可都喺嗰度。滿地可北面係勞倫第安區，係地質年代久遠嘅山區，東面係阿巴拉契亞山脈，一直延伸到東城同加斯佩地區。加斯佩半島向東伸入聖勞倫斯灣。

政治

内文：魁北克政治

魁北克政治係基於英國傳統西敏制嘅議會制，省督係國家元首查理斯三世喺魁北克入面嘅代表。省政府最大嘅係省長，由議會多數黨嘅黨魁做。魁北克實行一院制，議會叫做魁北克國民大會。

經濟

聖勞倫斯河谷係富庶嘅農業區，出好多奶製品、生果、蔬菜、牲畜同楓樹糖漿（魁北克係世界最大嘅楓糖產地）。河谷以北多數係針葉林，有好多河流湖泊。紙漿、造紙、林業同水電係魁省重要嘅經濟部門。

人口

内文：魁北克人口

• 總人口：8,501,833（2021年）
• 人口增長率：0.64%（2004年）
• 出生率：9.8‰（2003年）
• 死亡率：7.4‰（2003年）
• 淨移民增加：4.1‰（2003年）
• BB死亡率：4.6‰（2001年-2002年）
• 平均壽命：（2002年）
  • 男：76.3
  • 女：81.9
• 城鎮人口：80.04%(2001)
• 屋企講嘅語言：(2021)
  • 法文：85.5%
  • 英文：19.2%
  • 第種語言：14.9%

出面網頁

• （法文）Agora：魁北克在線法文百科全書
• （英文）魁北克政府
• （法文）魁北克嘅象徵
• （英文）你好魁北克（魁北克省官方旅遊網站）