閏年
西曆嘅閏年
[編輯]西暦額我畧曆係基於地球繞太陽公轉一週嘅時間作為一年，再畫分為12個月。
以一日24小時計（小時嘅最小單位秒由銫-133原子嘅一種特定躍遷定義），公轉周期實際上為365.242日，四年加埋嘅誤差有差唔多一日，所以每四年補一日，即係呢一年有366日，而呢一年就叫做閏年。用呢條數嘅西曆，係額我畧曆嘅前身，儒略曆。後來發現，四年一閏，每年補 0.25 日，比0.242日 補多咗 8/1000日 。所以後來額我畧改曆，每2000年又少 15個閏日。方法係，如果年份係100嘅倍數，就要俾400除得盡，先至係閏年，否則就係平年。所以1800年、1900年、2100年、2200年、2300年都係平年，而2000年、2400年，就係閏年。
唐曆嘅閏年
[編輯]唐曆係陰陽曆，即係同時考慮太陰（月亮嘅別稱）同太陽嘅運行來制定。
月球繞地球公轉周期為一個「月」，呢個係中文「月」呢個時間單位嘅由來。月球繞地球公轉嘅周期為29日到30日之間，平均為29.531日。一「年」有十二或者十三個月。同時，地球繞太陽公轉周期為之一「歲」，以每年冬至為一歲嘅第一日。所以傳統上，冬至嗰日會做節慶祝，甚至有話：「冬至大過年」。
留意：「歲」同「年」係唔同嘅單位，歲嘅長度係固定嘅，大約係365.24日；而年嘅長度就唔固定，平年得十二個月，所以會短啲，而閏年就有十三個月，會長啲。設置閏年，係為咗令「年」嘅平均長度符合「歲」嘅長短而引入嘅誤差補值。閏年多出來嗰個月叫閏月。
歲長365.242日，月長29.531日。 19歲（365.242 x19) 與 235 月 (29.531 x 235) 只相差0.1日 。235 個月除 12 為 19 剩 7。 所以，唐曆基本上係 19年7閏。
置閏規則：「無中置閏」
[編輯]唐曆每個月初一，一定係新月（定朔）。另外有二十四節氣（立春、雨水、驚蟄、春分、清明、穀雨，立夏、小滿、芒種、夏至、小暑、大暑，立秋、處暑、白露、秋分、寒露、霜降，立冬、小雪、大雪、冬至、小寒、大寒）。節氣按太陽一年四季位置而定,。二十四節氣中一半係「中氣」，梅花間竹咁出現。
唐曆置閏規則如下： 每年冬至所在月份，定為十一月(子月）。兩個子月之間，若果有十三個月，就要置閏。由子月（十一月）數起，第一個冇「中氣」嘅月分係閏月，所在嘅年係閏年。
例如，某年一、二三月皆有中氣。四月有立夏、小滿（中氣) ，之後嘅月，只有芒種，再下一個月有夏至（中氣）同小暑。只有芒種個個月就係閏四月，有夏至同小暑嘅，係五月。
「平氣」、「定氣」影响置閏
[編輯]响清初採用「時憲曆」以前，節氣之間相距時間一樣；稱為「平氣」。响呢種規則之下，出現「無中置閏」嘅月份，機會均等。所以响清朝以前，閏正月，閏十二月，並唔稀奇。
「時憲曆」改革之後，考慮其實地球公轉唔係均速，節氣定响太陽真實出現位置嘅時間，稱之為「定氣」。北半球冬天嘅時候，地球响近日點，公轉得快（開普勒定理）。夏天時，响遠日點，公轉慢。用定氣嘅農曆，冬天兩個節氣之間相隔日子短，而夏天節氣之間相隔日子長。所以由清朝開始，唐曆多數閏月都响夏天，春天或者秋天間中都有，但冬天閏月就極少見。1645年開始用時憲曆，要去到2033年，先會第一次有閏十一月。閏正月第一次要到2262年。閏十二月更加要等到3358年。
 |