Donald Trump

Donald Trump
Tē 47 jīm Bí-kok chóng-thóng
Chāi-jīm
Chiū-jīm 2025 nî 1 goe̍h 20 ji̍t
Hù chóng-thóng	J. D. Vance
Chêng-jīm	Joe Biden
Tē 45 jīm Bí-kok chóng-thóng
Jīm-kî 2017 nî 1 goe̍h 20 ji̍t – 2021 nî 1 goe̍h 20 ji̍t
Hù chóng-thóng	Mike Pence
Chêng-jīm	Barack Obama
Kè-jīm	Joe Biden
Kò-jîn chu-sìn
Chhut-sì	1946 nî 6 goe̍h 14 ji̍t （1946-06-14）(80 hòe) Bí-kok Niú-iok Chhī Hông-hiō Khu
Chèng-tóng	Kiōng-hô Tóng (1987–1999, 2009–2011, 2012–taⁿ) Kái-kek Tóng (1999–2001) Bîn-chú Tóng (2001–2009) Bû-tóng-che̍k (2011–2012)
Bú-hāu	Pennsylvania Tāi-ha̍k Wharton Ha̍k-īⁿ
Chhiam-miâ

Donald John Trump (1946 nî 6 goe̍h 14 ji̍t chhut-sì ), iā ū hoan-e̍k chò "Chhoan-phó͘ (川普)", sī chi̍t ūi Bí-kok ê seng-lí-lâng, tiān-sī miâ-jîn kiam chèng-tī jîn-bu̍t, chit-má sī Bí-kok tē-47-jīm chóng-thóng. 2016 nî I tāi-piáu Kiōng-hô Tóng chham-soán chóng-thóng tāi-soán, tī 11 goe̍h 8 hō kek-pāi Hillary Clinton tòng-soán Bí-kok chóng-thóng. Sui-jiân 2020 nî liân-jīm sit-pāi, m̄-koh 4-tang liáu-āu chài-tō͘ chham-soán, phah-pāi Joe Biden koh-chi̍t-pái tòng-soán Bí-kok chóng-thóng.

Trump bo̍k-chiân sī Trump Chi̍p-thoân ê táng-sū-tiúⁿ kiam chóng-chhâi. Tī i-ê seng-gâi tiong, Trump khí-chō liáu pān-kong toā-lâu, lí-siā, kiáu-tiûⁿ, soaⁿ-kiû kiû-po͘ kap kî-thaⁿ chē-chē thong-sè-kài ê sū-gia̍p. Tī tòng-soán Bí-kok chóng-thóng liáu-āu, ūi-tio̍h pī-bián lī-ek chhiong-tu̍t, i kā chi̍p-thoân kau hō͘ in kiáⁿ lâi koán-lí, m̄-koh Trump iu-goân tùi chi̍p-thoân ū ióng-iú-khoân.

Trump tī Niú-iok Chhī chhut-sì kap toā-hàn. I tī 1968 nî ùi Pennsylvania Tāi-ha̍k ê Wharton Ha̍k-īⁿ chhú-tit i-ê keng-chè-ha̍k ha̍k-sū ha̍k-ūi.

Chá-nî Seng-oa̍h, Chó͘-sian, Kàu-io̍k kap Kun-sū Tē-ūi

1946 nî 6 goe̍h 14 hō, Trump tī Niú-iok Chhī ê kīn-kau Hông-hiō Khu Jamaica Estates chhut-sì, tī chhù-lāi pâi tē-sì. I ê chhiú-chiok ū Maryanne, Elizabeth, Fred kap Robert, taⁿ kan-na a-chí Elizabeth iû-goân chāi-sè. Kî-tiong a-hiaⁿ Fred tī 1981 nî tio̍h in-ūi chiú-cheng tiòng-to̍k kòe-sin; Trump kóng chit kiāⁿ tāi-chì hō͘ i bô lim-chiú kap chia̍h-hun ê si̍p-koàn.