抗日战争胜利浙江受降纪念馆

侵浙日军投降仪式旧址（受降厅）
浙江省文物保护单位
所在	浙江省杭州市富阳区
编号	4-118
登录	1997年

抗日战争胜利浙江受降纪念馆

千人坑遗址

抗日战争胜利浙江受降纪念馆，简称受降抗战纪念馆，勒垃杭州市富阳区银湖街道受降村，是勒垃浙江省文物保护单位受降厅基础丄造个、畀富阳区文物保护中心（挂牌富阳区博物馆）管理。

历史

受降村本名宋殿村，勒垃富阳城北约莫10里，是余杭县城（今余杭街道）到富阳县城个公路必经之路，1937年12月24号沦陷，畀日本鬼子占领日军拿宋殿村变成控制钱塘江北面个杭州、富阳、余杭个指挥中心，勒垃宋殿驻扎一個中队，拿逃难地主宋作梅个房子做中队驻所，勒垃宋殿村周边修环形防御工事，设置有水牢、木笼、沸水锅、老虎凳咾啥个刑具，1937年开始多埭扫荡周边个午潮庙、东坞山等地，屠杀当地村民，只是宋殿村就有得370多村民畀东洋人杀脱，尸体统一集中厾勒村口杭富公路（乃朝国道320线富阳段）边浪、离开中队驻地约莫1华里个瓦窑山山里向，尸体填满6道沟，当地百姓也故咾叫此地千人坑。

1945年8月15号，日本投降，蒋介石电令第三战区长官顾祝同接收辖区里向日本占领区，因为第三战区包括上海、福建、浙江全部搭仔苏南、皖南，兵力勿足够接收所有地方，改成让第三战区只负责浙江地区个受降，受降地点选定垃杭州宋殿村，一是因为伊靠近钱塘江南岸个中国占领区、方便国军接收，两是因为受降一带老百姓畀日本人杀脱交交关关。8月20号，第三战区制定《第三战区接受日军投降计划》，副司令长官韩德勤任命为司令长官部前进指挥部主任，从江西铅山出发。9月4号16点30分，中日双方勒垃原先作为日军指挥所个宋殿村宋作梅地主屋里向举行洽降仪式。

1946年10月份，宋殿村勒垃个长新乡改名受降乡，纪念箇桩历史事体。因为宋殿村是受降乡个驻地，故咾宋殿村也叫“受降村”。1987年，受降乡改镇个辰光想过改名，必过伊辰光地方人大表决保留老名字。2007年，富阳市合并乡镇个辰光，传出来话要撤销受降镇，当地居民为咾保存“受降”个地名，拿宋殿村边浪个中秋村、大树下村两隻行政村合并成受降村，2013年受降镇搭仔高桥镇合并成立银湖街道，“受降”个地名通过受降村保留下来。杭州地铁受降站就是从箇地名来个。

1980年中日蜜月期个辰光，日本《读卖新闻》曾经组织到受降个友好访问，访华团团长中岛林一郎就是当伊辰光驻扎勒受降个日本兵，从日本带来樱花种勒富阳鹳山浪，想咾作为中日世代友好个见证。

纪念馆

受降抗战纪念馆占地4.3亩，建筑面积440多平方米，原本是当地大地主宋作梅个房子。1945年9月4号，侵浙日军第一三三师团师团长野地嘉平代表嘉兴、杭州、金华、宁波（包括舟山群岛）、厦门等地区日军勒垃箇楼里向畀国民党第三战区司令长官顾祝同投降。1995年抗日战争胜利50周年，经过修复，按照侵浙日军投降仪式旧址和千人坑遗址成立浙江人民抗战纪念馆，还勒垃宋殿村南面当年日军残杀中国人个千人坑个地方立碑。箇楼里向坐北朝南，泥石木结构，重檐亭式房屋。1995年9月份正式对外公展。1996年侵浙日军投降仪式旧址、千人坑遗址相继成为富阳市爱国主义教育基地、杭州市爱国主义教育基地。1997年成为省级重点文物保护单位。1998年2月份成为浙江省爱国主义教育基地。2005年被中宣部命名为第三批“全国爱国主义教育示范基地”。1995年开始，受降村村民林镇南作为当年受降仪式个见证人一家头看管受降厅，2007年10月份林镇南过脱仔么，同样是见证人个胡来兴老人接手箇生活到2015年。

受降厅外警钟庭

为咾迎接抗日战争结束70周年，富阳市对受降厅旧址、千人坑遗址、纪念馆改扩建，2015年9月2号正式启用，成为“浙江社会各界纪念中国人民抗日战争胜利70周年主题活动”个主会场，9月3号开始对公众开放。纪念馆个入口是V字形个，象征抗战胜利。受降厅搭仔伊地底下头个纪念馆有得“侵略暴行”、“不屈抗战”、“胜利欢庆”、“接受投降”、“审判战犯”5隻板块个展陈，按照从暗到明、从地下到地上个顺序参观，里向受降厅原址重点介绍日军投降、战犯审判个相关内容，纪念馆里向还有得300多件实物展品。离开受降厅，便到仔纪念馆入口底下个警钟庭，後头是穿过320国道个人行通道直达南面个千人坑遗址，千人坑遗址个碑文浪刻有抗战期间富阳人民个伤亡记录搭仔畀日本人杀脱个同胞个名。2015年入选第二批国家级抗战纪念设施、遗址名录。展馆、遗址对外免费开放，占地面积4300平方千米，建筑面积2600平方米。