ಲಾವೋಸ್

ಲಾವೋಸ್, (ಅಧಿಕೃತ ಪುದರ್ ಲಾವೋ ಜನತಾ ಪ್ರಜಾಸತ್ತಾತ್ಮಕ ಗಣರಾಜ್ಯ) ಆಗ್ನೇಯ ಏಷ್ಯಾದ ಒಂಜಿ ದೇಶ. ಆಗ್ನೇಯ ಏಷ್ಯಾಡ್ ಸಮುದ್ರ ತೀರ ಇಜ್ಜಾಂದಿನ ಒಂಜೇ ಒಂಜಿ ದೇಶ ಉಂದು. ನೆತ್ತ ವಾಯುವ್ಯಡ್ ಮ್ಯಾನ್ಮಾರ್ ಬೊಕ್ಕ ಚೀನಾ, ಮೂಡಾಯಿಡ್ ವಿಯೆಟ್ನಾಂ, ಆಗ್ನೇಯಡ್ ಕಾಂಬೋಡಿಯಾ, ಬೊಕ್ಕ ಪಡ್ಡಾಯಿ ಅಂಚನೆ ನೈಋತ್ಯಡ್ ಥೈಲ್ಯಾಂಡ್ ದೇಶೊಲು ಉಂಡು. ಲಾವೋಸ್‌ಡ್ ೭.೫ ಮಿಲಿಯನ್‌ಡ್ದ್ (೭೫ ಲಕ್ಷ) ಜಾಸ್ತಿ ಜನಸಂಖ್ಯೆ ಉಂಡು, ಬೊಕ್ಕ ನೆತ್ತ ರಾಜಧಾನಿ ಅಂಚನೆ ಮಸ್ತ್ ಜನ ಇಪ್ಪುನ ನಗರ ವಿಯೆಂಟಿಯಾನ್. ಲಾವೋಸ್ ದೇಸೊದ ಒಟ್ಟು ಇಸ್ತೀರ್ನೊ ೨,೩೬,೮೦೦ ಚದರ ಕಿಲೋಮೀಟರ್ ಉಂಡು. ಇಸ್ತೀರ್ನೊದ ಲೆಕ್ಕೊಡು ಪ್ರಪಂಚೊಡು ೮೯ನೇ ಸಾನೊಡು ಲಾವೋಸ್ ಉಂಡು.ಅಂಚನೆ ಜನಸಂಕೆದ ಆದಾರೊಡು ಲಾವೋಸ್ ೧೦೫ನೇ ಸಾನೊಡು ಉಂಡು.

೧೩ನೇ ಶತಮಾನರ್ದ್ ೧೮ನೇ ಶತಮಾನಮುಟ್ಟ ಮುಲ್ಪ ಲ್ಯಾನ್ ಕ್ಸಾಂಗ್ ಸಾಮ್ರಾಜ್ಯ ಅಸ್ತಿತ್ವೊಡು ಇತ್ತ್ಂಡ್. ೧೭೦೭ನೇ ಇಸವಿಡ್ ಉಂದು ಲುಯಾಂಗ್ ಪ್ರಬಾಂಗ್, ವಿಯೆಂಟಿಯಾನ್, ಬೊಕ್ಕ ಚಂಪಾಸಕ್ ಪನ್ಪಿ ಮೂಜಿ ಸಾಮ್ರಾಜ್ಯೊಲಾದ್ ವಿಭಜನೆ ಆಂಡ್. ೧೮೯೩ನೇ ಇಸವಿಡ್ ಈ ಸಾಮ್ರಾಜ್ಯೊಲು ಫ್ರೆಂಚೆರೆನ ಆಡಳಿತೊಡು ಸೇರಿಯ. ರಡ್ಡನೇ ಮಹಾಯುದ್ಧದ ಪೊರ್ತುಡು ಲಾವೋಸ್ ಜಪಾನಿಯೆರೆನ ಆಡಳಿತೊಡು ಇತ್ತ್ಂಡ್. ೧೯೪೫ಡ್ ಸ್ವತಂತ್ರೊ ಆಂಡಲಾ, ೧೯೪೯ಡ್ ಸ್ವಾಯತ್ತತೆ ತಿಕ್ಕುನ ಮುಟ್ಟ ಪಿರ ಫ್ರೆಂಚೆರೆನ ಆಡಳಿತೊಗು ಬತ್ತ್ಂಡ್. ೧೯೫೩ಡ್ ಲುಯಾಂಗ್ ಪ್ರಬಾಂಗ್‌ದ ಕಡೆತ ಅರಸೆ ಸಿಸಾವಾಂಗ್ ವಾಂಗ್‌ನ ಅಡಿಟ್ ಸಂವಿಧಾನಾತ್ಮಕ ರಾಜಪ್ರಭುತ್ವದೊಟ್ಟುಗು 'ಲಾವೋಸ್ ಸಾಮ್ರಾಜ್ಯ'ವಾದ್ ಉಂದು ಸಂಪೂರ್ಣ ಸ್ವತಂತ್ರೊ ಪಡೆಂಡ್. ೧೯೫೯ರ್ದ್ ೧೯೭೫ ಮುಟ್ಟ ನಡತಿನ ಅಂತರ್ಯುದ್ಧೊಡು ಕಮ್ಯುನಿಸ್ಟ್ ಪ್ಯಾಥೆಟ್ ಲಾವೋ ಬೊಕ್ಕ ರಾಯಲ್ ಲಾವೋ ಸಶಸ್ತ್ರ ಪಡೆಕುಲೆನ ನಡುಟು ಲಡಾಯಿ ನಡತ್ಂಡ್. ಲಡಾಯಿದ ದೆಸೆಡ್ದ್ ೧೯೭೫ನೇ ಇಸವಿಡ್ ಲಾವೋ ಪೀಪಲ್ಸ್ ರೆವಲ್ಯೂಷನರಿ ಪಾರ್ಟಿ 'ಲಾವೋ ಪೀಪಲ್ಸ್ ಡೆಮಾಕ್ರಟಿಕ್ ರಿಪಬ್ಲಿಕ್‌ನ್ ಉಂಡು ಮಲ್ತ್ಂಡ್. ಇಂದೆತ ಮೂಲಕ ಈ ಅಂತರ್ಯುದ್ಧ ಮುಗಿಂಡ್.