ಉತ್ತರ ಕೊರಿಯಾ

ಉತ್ತರ ಕೊರಿಯಾ- ಅಧಿಕೃತವಾದ್ ಕೊರಿಯಾ ಪ್ರಜಾಸತ್ತಾತ್ಮಕ ಜನತಾ ಗಣರಾಜ್ಯ- ಪೂರ್ವ ಏಷ್ಯಾದ ಒಂಜಿ ದೇಶ. ಇಂದೆತ ರಾಜದಾನಿ ಪ್ಯೊಂಗ್ಯಾಂಗ್ ಬೊಕ್ಕ ಮಸ್ತ್ ಮಲ್ಲ ನಗರ. ಉಂದು ಕೊರಿಯನ್ ಪರ್ಯಾಯ ದ್ವೀಪದ ಬಡಕಾಯಿಡ್ ಉಂಡು. ಈ ದೇಸೊದ ಬಡಕಾಯಿಡ್ ಯಾಲೂ ಬೊಕ್ಕ ತುಮೆನ್ ಸುದೆಕ್ಲು ಉಲ್ಲ. ಅಂಚನೆ ಈ ತುದೆತ್ತ ಆ ಮೈತ ಗಡಿಟ್ ಚೀನಾ ಬೊಕ್ಕ ರಷ್ಯಾ ದೇಶೊಲು ಉಲ್ಲ. ತೆಂಕಾಯಿಡ್ ಕೊರಿಯನ್ ಡಿಮಿಲಿಟರೈಸ್ಡ್ ಝೋನ್‌ದ ಗಡಿಟ್ ದಕ್ಷಿಣ ಕೊರಿಯಾ ದೇಸೊ ಉಂಡು. ಈ ದೇಶದ ಪಡ್ಡಾಯಿ ಬಾಗೊಡು ಹಳದಿ ಸಮುದ್ರ ಉಂಡು. ಅಂಚನೆ ಮೂಡಾಯಿದ ಬರಿಟ್ಟ್ ಜಪಾನ್ ಕಡಲ್ ಉಂಡು.

ಉತ್ತರ ಕೊರಿಯಾ ಒಂಜಿ ಸರ್ವಾಧಿಕಾರಿ ಬೊಕ್ಕ ವಂಶಪಾರಂಪರ್ಯ ಆಡಳಿತ ಇಪ್ಪುನ ದೇಶ. ಮುಲ್ಪ ಕಿಮ್ ಕುಟುಂಬದಕುಲು ಆಡಳಿತ ಮಲ್ತೊಂದುಲ್ಲೆರ್. ಉಂದು ಒಂಜಿ ಕಮ್ಯುನಿಸ್ಟ್ ದೇಶ, ಬೊಕ್ಕ ಪ್ರಜಾಸತ್ತಾತ್ಮಕ ಚುನಾವಣೆ ನಡಪುನ ಸಮಾಜವಾದಿ ದೇಶ ಪಂದ್ ದೇಸೊದುಲಾಯಿ ಪನ್ಪೆರ್. ಆಂಡ, ಈ ಚುನಾವಣೆಲು ಅನ್ಯಾಯ, ಪೈಪೋಟಿ ಇದ್ಯಾಂತಿನ ಬೊಕ್ಕ ದುಂಬೇ ನಿರ್ಧಾರ ಆಯಿನವು ಪಂದ್ ಪಿದಯಿ ದೇಸೊದ ಚುನಾವಣಾ ವೀಕ್ಷಕೆರ್ ಪನ್ಪೆರ್. 'ವರ್ಕರ್ಸ್ ಪಾರ್ಟಿ ಆಫ್ ಕೊರಿಯಾ' (WPK) ಉತ್ತರ ಕೊರಿಯಾದ ಆಡಳಿತ ಮಲ್ಪುನ ಒಂಜೇ ಒಂಜಿ ಪಕ್ಷ. ಮುಲ್ಪ ಪುದರ್ ಮಾತ್ರೊದ ರಡ್ಡ್ ವಿರೋದ ಪಕ್ಸೊಲು ಉಲ್ಲ, ಆಂಡ ಆಡಳಿತ ಪಕ್ಸೊದ ಬಿಗಿ ಈ ವಿರೋದ ಪಕ್ಸೊದ ಮಿತ್ತ್. ಅಂಚಾದ್ ಬೇತೆ ಉಪಾಯದಾಂತೆ ಈ ಪಕ್ಸೊಲು ಆಡಳಿತ ಪಕ್ಸೊ ಪನ್ಲೆಕ ಕೇನೊಡಾಪುಂಡು. ಉತ್ತರ ಕೊರಿಯಾದ ಕಾರ್ಕಾನೆಲು ಸರ್ಕಾರಿ ಉದ್ಯಮ, ಬೊಕ್ಕ ಸಾಮೂಹಿಕ ಕೃಷಿ, ಅಂತರಜಾಲ- ಇಂದು ಮಾತ ಸರ್ವಾದಿಕಾರಿ ಸರ್ಕಾರದ ನಿಯಂತ್ರಣಡ್ ಉಂಡು. ಆರೋಗ್ಯ, ಶಿಕ್ಷಣ, ಇಲ್ಲ್ ಬೊಕ್ಕ ಆಹಾರ ಉತ್ಪಾದನೆದಂಚಿನ ಎಚ್ಚದ ಸೇವೆಲು ಸಬ್ಸಿಡಿ ಅತ್ತಂಡ ಸರ್ಕಾರದ ಕಾಸ್‌ದ ಸಹಾಯಡ್ ನಡಪುಂಡು.

ಇತಿಹಾಸೊ

ಕೊರಿಯನ್ ಪರ್ಯಾಯ ದ್ವೀಪಡ್ ಪೂರ್ವ ಶಿಲಾಯುಗದ ಕಾಲರ್ದೇ ಜನಕುಲು ವಾಸಿಸೊಂದು ಇತ್ತೆರ್. ಕ್ರಿ.ಪೂ. ೭ನೇ ಶತಮಾನದ ಸುರುಟು ಚೀನಾದ ದಾಖಲೆಲೆಡ್ ನೆತ್ತ ಸುರುತ ಸಾಮ್ರಾಜ್ಯದ ಬಗ್ಗೆ ಉಲ್ಲೇಖ ಆತುಂಡು. ೭ನೇ ಶತಮಾನದ ಕಡೆಕ್ ಕೊರಿಯಾದ ಮೂಜಿ ಸಾಮ್ರಾಜ್ಯೊಲು ಒಟ್ಟಾದ್ 'ಸಿಲ್ಲಾ' ಬೊಕ್ಕ 'ಬಾಲ್ಹೇ' ಪುದರ್‌ದ ಸಾಮ್ರಾಜ್ಯೊ ಉದಿತ್ಂಡ್. ಐಡ್ದ್ ಬೊಕ್ಕ, ಕೊರಿಯಾನ್ ಗೊರ್ಯೊ ರಾಜವಂಶ (೯೧೮-೧೩೯೨) ಜೊಸಿಯಾನ್ ರಾಜವಂಶ (೧೩೯೨-೧೮೯೭) ಈ ಜಾಗೆನ್ ಆಳಿಯೆರ್. ಈ ಕೊರಿಯನ್ ಸಾಮ್ರಾಜ್ಯನ್ (೧೮೯೭-೧೯೧೦) ೧೯೧೦ಡ್ ಜಪಾನ್ ತನ್ನ ವಶಕ್ ದೆತೊಂಡ್. ೧೯೪೫ಡ್ ರಡ್ಡನೇ ಮಹಾಯುದ್ಧ ಮುಗಿದ್ ಜಪಾನ್ ಶರಣಾಯಿ ಬೊಕ್ಕ, ಕೊರಿಯಾನ್ ೩೮ನೇ ಪ್ಯಾರಲಲ್ ರೇಖೆದ ಆಧಾರಡ್ ರಡ್ಡ್ ಭಾಗ ಮಲ್ತೆರ್. ಬಡಕಾಯಿದ ಭಾಗ ಸೋವಿಯತ್ ಒಕ್ಕೂಟಗ್, ಬೊಕ್ಕ ತೆಂಕಾಯಿ ಭಾಗ ಅಮೇರಿಕದ ವಶಕ್ ಪೋಂಡ್.