Query Monitor

Descrición

Query Monitor é o panel de ferramentas para desenvolvedores de WordPress e WooCommerce. Permite depurar consultas á base de datos, erros de PHP, hooks e accións, bloques do editor de bloques, scripts e follas de estilo en cola, chamadas á API HTTP e moito máis.

Inclúe algunhas características avanzadas como a depuración de chamadas Ajax, chamadas á API REST, comprobacións de capacidades de usuario e compatibilidade completa con temas de bloques e a edición completa do sitio. Inclúe a capacidade de filtrar gran parte da súa saída por plugin ou tema, o que permite determinar rapidamente que plugins, temas ou funcións teñen un mal rendemento.

Query Monitor céntrase en presentar a súa información de forma útil, por exemplo mostrando as consultas agregadas á base de datos agrupadas polos plugins, temas ou funcións que as provocan. Engade un menú á barra de ferramentas de administración que mostra unha visión xeral da páxina actual, e a información de depuración completa móstrase en paneis cando seleccionas un elemento do menú.

Query Monitor é compatible con versións de WordPress de ata tres anos de antigüidade e con PHP 7.4 ou superior.

Para obter información completa, consulta a web de Query Monitor.

Esta é unha visión xeral do que se mostra en cada carga de páxina:

• Consultas á base de datos, incluíndo avisos de consultas lentas, duplicadas ou erróneas. Permite filtrar por tipo de consulta (SELECT, UPDATE, DELETE, etc.), compoñente responsable (plugin, tema, núcleo de WordPress) e función que fai a chamada, e ofrece vistas agregadas separadas para cada un.
• O nome do arquivo do modelo, a xerarquía completa de modelos e os nomes de todas as partes de modelo que se cargaron ou non (para temas de bloques e temas clásicos).
• Erros de PHP presentados de forma clara xunto co seu compoñente responsable e a pila de chamadas, e unha advertencia visible na barra de ferramentas de administración.
• Uso de funcionalidades «Doing it Wrong» ou obsoletas no código do teu sitio.
• Bloques e propiedades asociadas dentro do contido das entradas e dentro da edición completa do sitio (FSE).
• Regras de reescritura coincidentes, cadeas de consulta asociadas e variables de consulta.
• Scripts e follas de estilo en cola, xunto coas súas dependencias, dependentes e alertas de dependencias rotas.
• Axustes de idioma e arquivos de tradución cargados (arquivos MO e JSON) de cada dominio de texto.
• Solicitudes da API HTTP, co código de resposta, o compoñente responsable e o tempo empregado, con alertas para solicitudes fallidas ou erróneas.
• Comprobacións de capacidades de usuario, xunto co resultado e os parámetros pasados á comprobación.
• Información do contorno, incluíndo información detallada sobre PHP, a base de datos, WordPress e o servidor web.
• Os valores de todas as funcións condicionais de WordPress como is_single(), is_home(), etc.
• Datos transitorios que se actualizaron.
• Uso de switch_to_blog() e restore_current_blog() en instalacións Multisite.

Ademais:

• Sempre que se produce unha redirección, Query Monitor engade unha cabeceira HTTP que contén a pila de chamadas, para que poidas usar o teu inspector HTTP favorito ou as ferramentas de desenvolvemento do navegador para rastrexar o que provocou a redirección.
• A resposta de calquera solicitude Ajax iniciada con jQuery na páxina conterá varia información de depuración nas súas cabeceiras. Os erros de PHP tamén se envían á consola de desenvolvemento do navegador.
• A resposta dunha solicitude identificada da API REST de WordPress conterá nas súas cabeceiras unha visión xeral da información de rendemento e dos erros de PHP, sempre que o usuario identificado teña permiso para ver a saída de Query Monitor. Unha solicitude da API REST con envoltorio incluirá aínda máis información de depuración na propiedade qm da resposta.

Por defecto, a saída de Query Monitor só se mostra aos administradores en instalacións dun só sitio e aos Super Administradores en instalacións Multisite.

Ademais, podes establecer unha cookie de identificación que che permite ver a saída de Query Monitor cando non estás conectado (ou se estás conectado como un usuario que non é administrador). Consulta o panel de Axustes para obter máis detalles.

Extensión de navegador

Query Monitor tamén está dispoñible como extensión opcional para as ferramentas de desenvolvemento do navegador. É unha alternativa ao panel integrado na páxina que se mostra na barra de ferramentas de administración.

Usar a extensión de navegador ten algunhas vantaxes fronte ao panel integrado na páxina:

• O panel de Query Monitor non ocupa espazo na páxina que estás a inspeccionar
• O panel pódese redimensionar, desacoplar e mover como calquera outro panel das ferramentas de desenvolvemento

Aquí podes atopar información sobre a extensión de navegador de Query Monitor.

Outros plugins

Manteño varios plugins máis para desenvolvedores. Bótalles un ollo:

• User Switching permite cambiar instantaneamente entre contas de usuario en WordPress.
• WP Crontrol permíteche ver e controlar o que sucede no sistema WP-Cron

Grazas

O tempo que dedico a manter este plugin e outros está patrocinado en parte por:

• Automattic
• ServMask
• WP Staging
• Todos os meus amables patrocinadores en GitHub

Declaración de privacidade

Query Monitor é privado por defecto e sempre o será. Non almacena de forma persistente ningún dos datos que recolle. Non envía datos a terceiros nin inclúe recursos de terceiros. Aquí podes atopar a declaración de privacidade completa de Query Monitor.

Declaración de accesibilidade

Query Monitor pretende ser totalmente accesible para todos os seus usuarios. Aquí podes atopar a declaración de accesibilidade completa de Query Monitor.