Congreso dos Deputados

Congreso dos Deputados
Nome orixinal     Congreso de los Diputados (es)
Instancia de Cámara de deputados  Parte de Cortes Xerais  Composto por 350x deputado no Congreso dos Deputados  Cargo dirixente presidente do Congreso dos Deputados
Implicados  Ten en propiedade Canal Parlamento
Cifras e dimensións  Número de escanos    350
Localización  Sede Palacio das Cortes  Xurisdición España  País España  Coordenadas 40°24′59″N 3°41′48″O
Fontes e ligazóns VIAF 134718539 ISNI 0000000119564410 Freebase /m/01zf63 OpenAlex P4310321719  Páxina WEB congreso.es
Wikidata G:Commons C:Commons

O Congreso dos Deputados é a cámara baixa das Cortes Xerais, o órgano constitucional que representa o pobo español. Reúnese para sesións no Palacio das Cortes, situado na praza das Cortes de Madrid.

A Constitución de 1978 establece un Parlamento bicameral. As Cortes Xerais están formadas polo Congreso dos Deputados e o Senado. Ámbalas dúas Cámaras representan o pobo español. As Cortes Xerais:

• exercen a potestade lexislativa do Estado.
• aproban os seus orzamentos.
• controlan a acción do Goberno.
• e teñen as demais competencias que lles atribúe a Constitución.

No entanto, este bicameralismo non supón unha equiparación completa entre Congreso e Senado. A Constitución resérvalle ó Congreso unha serie de funcións e facultades que revelan a súa primacía. Deste xeito, o Congreso autoriza a formación do goberno, pode provoca-lo seu cesamento, coñece en primeiro lugar a tramitación dos proxectos lexislativos e dos orzamentos e debe confirmar ou rexeitar as emendas ou vetos que pode aprobar o Senado sobor destes textos lexislativos.

Historia

O Congreso dos Deputados ten o seu antecedente máis remoto no Estatuto Real de 1834, outorgado pola raíña María Cristina, rexente durante a minoría de idade de Isabel II, e que estabeleceu por primeira vez en España a configuración bicameral das Cortes, ao dividilas en dous Estamentos: o de Próceres do Reino e o de Procuradores do Reino.

O Estamento dos Procuradores do Reino tiña carácter electivo e unha composición que correspondía netamente á representación das Cidades e Burgos con dereito de voto nas Cortes do Antigo Réxime.

Na Constitución de 1837, aprobada como consecuencia do Motín da Granxa de San Ildefonso que forzou á raíña rexente a sancionala, recolleuse por primeira vez a denominación de «Congreso dos Deputados» para a Cámara Baixa das Cortes Xerais.

Nas sucesivas Constitucións de 1845, 1856, 1869 e 1876 preservaron a configuración do Congreso dos Deputados como unha cámara de representación popular, que nalgúns casos tivo atribuída preeminencia sobre o Senado en materia de forzas armadas e de contribucións e crédito público e control político aos membros do Goberno.

Composición

A Constitución establece que o Congreso contará cun mínimo de 300 e un máximo de 400 Deputados, debendo a lei electoral concretar este número. A normativa vixente (Lei Orgánica do Réxime Electoral Xeral de 19 de xuño de 1985) fixa en 350 o número de membros da Cámara.

Tódolos Deputados son elixidos por sufraxio universal, libre, igual, directo e secreto. A circunscrición electoral é a provincia. A lei electoral asigna dous escanos a cada unha delas e distribúe os demais en proporción á poboación respectiva. Ceuta e Melilla elixen un representante cada unha.

Composición tralas eleccións xerais de España de xullo de 2023
Grupo parlamentario			Portavoz	Líder	Deputados
	Popular	PP	Ester Muñoz	Alberto Núñez Feijóo	137
	Socialista	PSOE: 102 PSC: 19	Patxi López	Pedro Sánchez	121
	VOX	Vox	Pepa Millán	Santiago Abascal	33
	Plurinacional Sumar	Moviemento Sumar: 11 Comuns Sumar: 6 Izquierda Unida: 5 Más Madrid: 2 IdPV: 1 MÉS: 1	Verónica Martínez	Yolanda Díaz	26
	Republicano	ERC: 12	Gabriel Rufián		7
	Junts per Catalunya	JxCAT: 7	Míriam Nogueras		7
	Euskal Herria Bildu	EH Bildu: 6	Mertxe Aizpurua		6
	Vasco (EAJ-PNV)	EAJ-PNV: 5	Maribel Vaquero		5
	Mixto	Podemos: 4 CC: 1 BNG: 1 UPN: 1 Més-Compromís: 1 Non adscrito: 1	Ione Belarra	Ione Belarra Cristina Valido Néstor Rego Alberto Catalán Agueda Micó Javier Ortega-Smith	9

Órganos

Mesa do Congreso dos Deputados

Cargo	Titular	Lista
Presidenta	Francina Armengol Socias	PSOE
Vicepresidente primeiro	Alfonso Rodríguez Gómez de Celis	PSOE
Vicepresidenta segunda	José Antonio Bermúdez de Castro	PP
Vicepresidenta terceira	Esther Gil de Reboleño	Sumar
Vicepresidente cuarto	Marta González Vázquez	PP
Secretario primeiro	Gerardo Pisarello Prados	ECP
Secretaria segunda	Isaura Leal Fernández	PSOE
Secretario terceiro	Guillermo Mariscal Anaya	PP
Secretario cuarto	María del Carmen Navarro Lacoba	PP

Prerrogativas dos deputados

Os deputados, o mesmo que os senadores, dispoñen de dúas importantes prerrogativas, que a Constitución lles recoñece, non con carácter de privilexio persoal, senón para protexer o exercicio das súas funcións. Inviolabilidade e inmunidade son propiamente garantías institucionais das Cámaras, das que gozan os seus membros en canto participan no desenvolvemento das funcións constitucionais asignadas ó Congreso dos Deputados.

• A inviolabilidade afecta ás opinións manifestadas e ós votos emitidos no exercicio do cargo representativo e supón a irresponsabilidade polos mesmos. Así e todo, esta irresponsabilidade non ten carácter absoluto, senón só en relación a terceiros estraños á Cámara. No ámbito interno, o deputado está suxeito ás normas de disciplina parlamentaria que, de acordo co Regulamento, aplican o presidente e a Mesa do Congreso.^{[Cómpre referencia]}
• A inmunidade cobre os actos realizados polo deputado durante o período do seu mandato e supón a prohibición de ser inculpado ou procesado sen a previa aprobación do Congreso, e que a súa detención tan só sexa posible no caso de flagrante delito.^{[Cómpre referencia]}

Os deputados perciben unha asignación económica con cargo ós orzamentos da Cámara, tendo dereito, asemade, a outras axudas (dietas), franquías e indemnizacións por gastos indispensables para o cumprimento das súas funcións.^{[Cómpre referencia]}

Sede

Artigo principal: Palacio das Cortes.

O Palacio das Cortes é o edificio que alberga o Congreso dos Deputados. Está situado entre a rúa Zorrilla e a Carreira de San Xerome, a escasa distancia do Paseo do Prado, en Madrid. É un dos edificios emblemáticos do Madrid do século XIX, de estilo neoclásico.

Véxase tamén

Outros artigos

• Composición do Congreso dos Deputados de España
• Lista de presidentes do Congreso dos Deputados de España
• Lista de deputados galegos no Congreso desde a Transición

Ligazóns externas

• Páxina Oficial do Congreso dos Deputados (en castelán)