Petisiya hüququ

Ərizə vermək hüququ, Müraciət etmək hüququ və ya Petisiya hüququ — fərdlərin şəxsi və ya ictimai məsələlərlə əlaqədar arzu, təklif və şikayətlərini təkbaşına və ya başqaları ilə bərabər məhkəmə orqanlarından kənar rəsmi dövlət idarələrinə təqdim edə bilmə hüququdur.

Təklif formulu müraciətlərdə rəsmi orqanlardan birbaşa müraciət edənin özü və ya ictimai bir iş üçün öz səlahiyyətləri daxilində müəyyən bir hərəkətin edilməsi yaxud qərarın qəbul olunması xahiş edilir; şikayət xarakterli müraciətlərdə isə ümumi mənada haqsızlığa məruz qalan bir şəxs və ya orqanın mənafelərinin pozulması yaxud hüquq sistemindəki nöqsanlar ortaya qoyulur. Müraciət etmək hüququ, fərdlərin özləri və ya ictimai işlərlə əlaqədar olaraq, təkbaşına və ya kollektiv şəkildə məhkəmədən kənar dövlət orqanlarına öz problemlərini, şikayətlərini və məruz qaldıqları haqsızlıqları çatdıraraq həll yolu tapmalarını tələb etmələrindən ibarət mühüm bir insan hüququ kimi müəyyən edilir. Müraciət etmək hüququ siyasi hüquqlar kateqoriyasına daxildir. Azərbaycan Respublikasında bu hüquq, Azərbaycan Respublikasının Konstitusiyasının 57-ci maddəsi ilə təsbit edilmiş və Azərbaycan vətəndaşları ilə yanaşı, ölkədə qanuni əsaslarla yaşayan əcnəbilərə və vətəndaşlığı olmayan şəxslərə də tanınmışdır.