Xuegos Mundiales Nómades
Xuegos Mundiales Nómades | |
|---|---|
.jpg) | |
| Xeneral | |
| Tipu de competición | tornéu |
| País | Kirguistán |
| Historia | |
| Fundación | 2014 |
| Web oficial | |
 | |
Los Xuegos Mundiales Nómades (n'inglés, World Nomad Games) son una competición deportiva y cultural internacional dedicada a los deportes tradicionales, los xuegos populares y el patrimoniu de los pueblos de tradición nómada. Creáronse por iniciativa de Kirguistán y celebráronse per primer vez en 2014, col oxetivu de conservar, revitalizar y dar proyeición internacional a práutiques deportives, culturales y conocimientos tradicionales vinculaos especialmente a les sociedaes nómades d'Asia Central. El programa combina competiciones deportives con actividaes culturales y científiques.[1]
Historia
[editar | editar la fonte]L'orixe institucional de los Xuegos remóntase a la Declaración de Biskek de 2012, adoutada nuna xunta de xefes d'Estáu de países túrquicos na que participaron Azerbaixán, Kazakstán, Kirguistán y Turquía. La iniciativa materializóse dos años depués colos primeros Xuegos Mundiales Nómades, celebraos ente'l 9 y el 14 de setiembre de 2014 en Cholpon-Ata, a la vera del llagu Issyk-Kul. Nesa primer edición participaron 583 deportistes, procedentes de 19 países, y disputáronse diez disciplines competitives y cuatro d'exhibición. Amás de les pruebes deportives, organizáronse actos culturales, artesanales y científicos nel hipódromu de Cholpon-Ata y nel valle de Kyrchyn.[2]
La segunda edición volvió celebrase en Cholpon-Ata del 3 al 8 de setiembre de 2016 y supunxo una ampliación notable del eventu. Participaron más de 1.200 persones de 62 países y el programa llegó a 26 disciplines d'etnodeporte, amás de les actividaes culturales y científiques. La tercer edición, celebrada en 2018, volvió tener como sede principal Cholpon-Ata y reunió más de 2.000 participantes de 82 países en 37 disciplines, ente elles kok-boru, alysh, ordo, llucha kirguistanina, arcu tradicional y distintes carreres ecuestres.[3][4]
Tres les trés primeres ediciones en Kirguistán, los Xuegos empezaron a celebrase n'otros países. Los IV Xuegos Mundiales Nómades tuvieron llugar ente'l 29 de setiembre y el 2 d'ochobre de 2022 n'İznik, Turquía, convirtiéndose na primer edición celebrada fuera del país fundador. Participaron más de 3.000 deportistes de 102 países y programáronse alredor de cuarenta disciplines, amás d'actividaes culturales, científiques y educatives.[5]
La quinta edición celebróse n'Astaná, Kazakhstan, del 8 al 13 de setiembre de 2024. Reunió unos 2.800 participantes de 89 países y incluyó 21 disciplines deportives y más de cien actividaes culturales. Kazakhstan encabezó'l medayeru con 112 medayes, siguíu de Kirguistán con 65 y Rusia con 49. Ente les disciplines figuraron el kokpar, el kok-boru, les carreres baige, el qazaq kuresi, distintes modalidaes de llucha tradicional, el tiru con arcu a caballu, el togyzkumalak, el mangala y la cetrería tradicional.[6]
Los VI Xuegos Mundiales Nómades devolvieron la competición a Kirguistán y empezaron el 31 d'agostu de 2026. La ceremonia inaugural celebróse en Biskek, mentes que la mayor parte del programa deportivu, cultural y científicu se distribuyó pela rexón d'Issyk-Kul hasta'l 6 de setiembre. La organización anunció la participación de delegaciones de más de cien países, y la edición incluyó arcu a caballu, deportes tradicionales de fuerza, distintes modalidaes nacionales de llucha y xuegos d'exhibición.[7]
Deportes y programa cultural
[editar | editar la fonte]El programa deportivu de los Xuegos varia d'una edición a otra y combina disciplines procedentes de distintos pueblos y rexones. Tienen especial importancia los deportes ecuestres, como'l kok-boru, el kokpar, les carreres de caballos de distancia y les pruebes de destreza a caballu. A estes súmense diverses formes de llucha tradicional, como'l alysh, el qazaq kuresi, el kurash, el koresh o'l ssireum, según la edición. Tamién formen parte del programa'l tiru con arcu, el arcu a caballu, deportes de fuerza y xuegos intelectuales tradicionales como'l togyzkumalak, el toguz korgool, el mangala o l'oware.[8]
Los Xuegos nun se conciben únicamente como una competición deportiva. Les ediciones inclúin habitualmente una denominada «etnoaldea» o espacios asemeyaos nos que se representen formes tradicionales d'hábitat, artesanía, gastronomía, música, danza y vestimenta. Completen el programa congresos, simposios y encuentros dedicaos al estudiu de les cultures nómades, los conocimientos tradicionales y la conservación del patrimoniu cultural inmaterial. Esta combinación de deporte, cultura y investigación convirtióse nuna de les principales carauterístiques distintives de los Xuegos frente a otres competiciones deportives internacionales.
La dimensión patrimonial del eventu recibió tamién reconocencia internacional. La UNESCO participó na quinta edición celebrada n'Astaná y relacionó los Xuegos cola promoción de los valores de los deportes tradicionales y del patrimoniu cultural de les sociedaes nómades. La organización internacional señaló igualmente la inclusión de los Xuegos na Llista Representativa del Patrimoniu Cultural Inmaterial de la Humanidá en 2021 y destacó'l so papel nel diálogu intercultural y na tresmisión de práctiques tradicionales ente xeneraciones.[9]
Disciplines
[editar | editar la fonte]El programa de los VI Xuegos Mundiales Nómades inclúi 43 disciplines deportives, repartíes ente xuegos tradicionales, carreres y competiciones ecuestres, estilos nacionales de llucha, deportes de fuerza, xuegos intelectuales, tiru con arcu y caza tradicional.[10]
Xuegos nacionales
[editar | editar la fonte]Carreres de caballos
[editar | editar la fonte]Competiciones ecuestres
[editar | editar la fonte]Estilos nacionales de llucha
[editar | editar la fonte]Deportes tradicionales de fuerza
[editar | editar la fonte]Xuegos intelectuales tradicionales
[editar | editar la fonte]Tiru con arcu tradicional
[editar | editar la fonte]- Regla turca: Puta turca
- Regla kirguisa: Teke Buta
Tiru con arcu a caballu
[editar | editar la fonte]Caza tradicional con animales
[editar | editar la fonte]Ediciones
[editar | editar la fonte]| Edición | Añu | Sede | País |
|---|---|---|---|
| I | 2014 | Cholpon-Ata | Kirguistán |
| II | 2016 | Cholpon-Ata | Kirguistán |
| III | 2018 | Cholpon-Ata | Kirguistán |
| IV | 2022 | İznik | Turquía |
| V | 2024 | Astaná | Kazakstán |
| VI | 2026 | Biskek y Issyk-Kul | Kirguistán |
Ver tamién
[editar | editar la fonte]Referencies
[editar | editar la fonte]- ↑ «World Nomad Games». World Nomad Games. Consultáu'l 2 de setiembre de 2026.
- ↑ «I World Nomad Games 2014». World Nomad Games. Consultáu'l 2 de setiembre de 2026.
- ↑ «II World Nomad Games 2016». World Nomad Games. Consultáu'l 2 de setiembre de 2026.
- ↑ «III World Nomad Games 2018». World Nomad Games. Consultáu'l 2 de setiembre de 2026.
- ↑ «IV World Nomad Games 2022». World Nomad Games. Consultáu'l 2 de setiembre de 2026.
- ↑ «V World Nomad Games 2024». World Nomad Games. Consultáu'l 2 de setiembre de 2026.
- ↑ «Dates Set for the 2026 World Nomad Games». World Nomad Games (21 d'ochobre de 2025). Consultáu'l 2 de setiembre de 2026.
- ↑ «5th World Nomad Games Astana 2024». Directorate for the Preparation and Holding of the 5th World Nomad Games. Archiváu dende l'orixinal, el 2026-07-01. Consultáu'l 2 de setiembre de 2026.
- ↑ «Celebrating the values of traditional nomadic sports at the 5th World Nomad Games in Astana». UNESCO. Consultáu'l 2 de setiembre de 2026.
- ↑ «Sports Disciplines». World Nomad Games. Consultáu'l 2 de setiembre de 2026.
Enllaces esternos
[editar | editar la fonte]| Control d'autoridaes |
|
|---|
Datos: Q18071032