Rhönrad

Studente bim Rhönradturne (1930)

S Rhönrad isch e Sportgrät, wo us zwei Reife bestoht. Die beide Reife sind dur sechs Sprosse – zwei eifachi Stange (Spreizsprosse), zwei Griffsprosse und zwei Brettsprosse – mitenand verbunde.

Dr Durchmässer vom Rad hanget vo dr Grössi vom Turner ab, so dass er fast ganz gschtreckt uf de Brätter cha stoh und sich an de Griffe cha hebe. Es git Reder mit eme Durchmässer vo 130 bis 245cm, wo zwüsche 40 und 60kg wiege.

Gschicht

Erfunde worde isch s Rhönrad vom Otto Feick (1890–1959), em Sohn vonere Schmidsfamilie us de Pfalz. Als Chind isch er in zwei verbundene Wagereife dr Hügel abgrollt. Später, wäred er 1921 im Gfängnis z Mainz gsässe isch, het er d Idee gha, druss es Sportgret z mache. S gschützte Patent für s „Reifenturn- und -sportgerät“ het er schliesslich im Jahr 1925 aagmäldet. Dr Name „Rhönrad“ isch 1926 gschützt worde.

Bi de Olympische Summerspiil 1936 z Berlin isch dr Sport vo 120 Turner vorgfüehrt worde, isch aber nie e olympischi Disziplin worde. Wäred em Zweite Wältchrieg isch dr Sport vollständig zum Erlige cho. Erscht ab 1959, mit dr Ufnahm in Dytsche Turner-Bund (DTB) und dr Yyfüehrig vo Kunststoffbeschichtige für d Stahlreife, het dr Sport wider an Bedütig gwunne.

Dur d Gymnaestrada 1982 z Züri isch d Basis für di internationali Arbet gleit worde. Das het 1992 zur erschte Europameischterschaft z Liestal in dr Schwyz und 1995 zur Gründig vom Internationale Rhönradturn-Verband (IRV) gfüehrt. Syt däm organisiert dr IRV alli zwei Jahr d Wältmeischterschafte.

Diszipline

Paarturne (1996)

Bi de Einzelwettkämpf git s drei Diszipline:

• Geradeturne: S Rad rollt uf beide Reife ufere gerade Flächi vo 23 mal 3 Meter. D Turner zeige Küre, wo im Erwachseneberiich passend zu Musig (ähnli wie bim Yschunstlauf) vorgfüehrt wärde.
• Spiraleturne: S Rad bewegt sich nur uf eim vo de beide Reife und „tällert“ wie e Münze. Dr Turner muess s Rad dur Gwichtsverlagerig uf dr richtige Höchi hebe.
• Sprung: S Rad wird mit Schwung aagschupft, dr Turner springt im Steigerigslauf uf s Rad und macht drnach us dr Grätsch-, Hock- oder Standposition e Sprung (z. B. e Salto) uf e Matte.

Code of Points

Mit em Reglemänt „Code of Points“ wärde d Küre bewertet. D Gsamtpunktzahl berächnet sich us:

${\text{Schwierigkeit (max. 10.0)}}+{\text{Ausferig (max. 10.0)}}-{\text{noitrali Abzüg}}={\text{max. 20.0 Punkte}}$

D Schwierigkeit bewertet die acht schwirigschte Elemänt vo dr Kür. Bi dr Ausfüehrig wärde für Haltungsfähler Pünkt (0.1, 0.3 oder 0.5) abzoge. Bi Sturz oder Berüehrig dur d Trainer git s 1.0 Punkt Abzug.

Wältmeischterschafte

D Wältmeischterschafte wärde syt 1995 alli zwei Jahre uustrage (mit ere Underbrächig wäge dr COVID-19-Pandemie im Jahr 2020):

Nr.	Jahr	Austragungsort	Land
1	1995	Den Helder	Niederlande Niiderlande
2	1997	Antwerpen	Belgien Belgie
3	1999	Limburg an der Lahn	Deutschland Dytschland
4	2001	Liestal	Schweiz Schwiz
5	2003	Lillehammer	Norwegen Norwege
6	2005	Aachen / Bütgenbach	Deutschland Dytschland / Belgien Belgie
7	2007	Salzburg	Osterreich Öschterriich
8	2009	Baar	Schweiz Schwiz
9	2011	Arnsberg	Deutschland Dytschland
10	2013	Chicago	Vereinigte Staaten Vereinigti Staate
11	2015	Lignano Sabbiadoro	Italien Italie
12	2016	Cincinnati	Vereinigte Staaten Vereinigti Staate
13	2018	Magglingen	Schweiz Schwiz
14	2022	Sønderborg	Dänemark Dänemark
15	2024	Almere	Niederlande Niiderlande
16	2026	Göttingen	Deutschland Dytschland

Weblink

• Website vom Internationale Rhönradturn-Verband (IRV)