Bora Bora

Bora Bora
	NASA-Ufnaam vo Bora Bora NASA-Ufnaam vo Bora Bora
Gwässer	Pazifische Ozean
Archipel	Gsellschaftsinsle
Geografischi Laag	16° 30′ S, 151° 45′ WKoordinate: 16° 30′ S, 151° 45′ W
	Bora Bora (Gesellschaftsinseln) Bora Bora
	Bora Bora (Gesellschaftsinseln) Bora Bora
Zaal vo de Insle	ca. 30
Hauptinsle	Bora Bora
Landflechi	29,3 km²
Höggsti Erhebig	Mont Otemanu; 727 m
Iiwooner	8927 (2007)
	Topografischi Charte Topografischi Charte

Bora Bora isch en Atoll, wo zur Grubbe vo de Gsellschaftsinsle in Franzöösisch-Polynesie ghöört, gnauer zu de Insle under em Wind, im Süd-Pazifik. S Atoll lit öbbe 260 km nordwestlig vo Tahiti bi 151° 44' West und 16° 29' Süd und het e Landflechi vo im Ganze 38 km².^[1]

Geologii und Geografii

Bora Bora isch en Atoll, wo die klassischi Atollform het mit eme Bärg in dr Middi und eme Ring vo Koralle mit e Hufe Motus zringsum het, wie s dr Charles Darwin beschriibe het. S Atoll het sich scho wit entwigglet: D Caldera vom Zentralvulkan isch scho versunke und nume no Däil vom Rand vom verwitterete Krater stönde no us em Meer uuse, drunder die höggste Erhebige vo dr Insle: dr Mont Otemanu mit 727 m, dr Mont Pahia mit 661 m und dr Mataihua mit 314 m.

D Zentralinsle Bora Bora bestoot zum grösste Däil us basaltischer Lava. Die chliinere Motus si flachi, sandigi Koralleinsle. D Hauptinsle isch 9 km lang und an iirer bräitiste Stell 5 km bräit. D Siidlige befinde sich alli an dr Küste, s Innere vo dr Insle isch fast ganz unerschlosse. Um d Insle ume dr Küste nooch goot e Ringstrooss, wo 32 km lang isch.

Bora Bora het 9'610 Iiwooner (Stand: 2012).^[2] Dr grösst Ort isch Vaitape und het öbbe 4'600 Iiwooner. Er lit uf dr Westsite vo dr Insle, wisawii vo dr Hauptpassaasche in d Lagune, dr Passe Teavanui, wo au für grösseri Chrüzfaartschiff dief gnueg isch. Anderi Ortschafte si s Dörfli Faanui im Nordweste, wo früener d Herrscherfamilie gwoont het, und Anau im Oste.